بس مافيش رصيد

عايز اتكلم
بس ماعيش رصيد
عايز اتكلم
بس مافيش نصيب
********

عايز اكلم صاحبي
اقله واحشني
ليه بعدت عني يا غالي ؟؟؟
نسيت أيامنا السعيدة
و ذكرياتنا الكثيرة
ضحكتنا ام صوت عالي
و هتافنا علي التوافه
عايز اكلم صاحبي اقله
فينك و فين ايامي بيك
عاملة ايه الدنيا فيك
مبسوط معاها ولا
شايل هموم ولا
بتحب ولا
اخبارك ايه متقولها
سعيدة ولا
عايز اقلك
فاكرني ولا
عايز اكلم صاحبي
بس مافيش رصيد
بس مافيش نصيب
*******

عايز اكلم اهلي
و اقول فينكم يا أهلي
ولا حتي يا زمالك
سبتوني و رمتوني في المهالك
كنتوا فين و انا محتاج لحضنكم
كنتوا فين و انا عايز اضمكم
كنتوا فين في فرحي
كنتوا فين في حزني
كنتوا فين في جرحي
بإختصار كنتوا فين في دنيتي
اه ه ه ه ه... بتاكلوني
مش كنتم تقولولي
بدل ما انا عمال اعتب و اعيط علي الفاضي
أعرف انكم ضحيتوا بيا عشان ترضعوني
عشان تبيضوا الشقة و تصلحوا كرسي الصالون بدل ما تشيلوني
ربنا يخليكوا ليا ما انتوا ربتوني
اني لازم اخد شهادة و ماسرقش من صحابي
ماكدبش علي الميس بس اكدب علي تليفون صاحب دادي
بس

علمتوني احب ؟؟؟
حسستوني بحضن ؟؟؟
طاب سؤال
بعد كل الأوامر و الطلبات
حد فيكوا طبطب عليا و خدني بالحضن ؟؟؟
و قالي متزعلش من الدنيا ربيتك قوي تتحمل و تحب
و لاكنتوا ساعتها بتطبخولي
عايز اكلم أهلي
بس مافيش رصيد
بس مفيش نصيب
*******

عايز اكلم السنترال
اقوله حولني علي اكبر راس
اسئله هو فين الكفيار ؟؟؟
سمعت انه حلو و انا زهقت من الخضار
ايه ايه ايه و هو ماله الخضار
لا انت مش فاهمني احنا بنقول علي الفول يا خضار
سيبك انت من الجزر و الخيار
استكفينا خلاص
ورامنا منهم من أيام الكفار
طاب فين السلطة
طماطم دي ولا بقصمات
جرجير دة ولا برسيم بتاع الحمار
لتكونش فاكرني حمار
و تقولي شي حا
لا اسمحلي مش عشان ماشي زي الحمار
و شغال زي الحمار
و باكل زي الحمار
و بتعامل زي الحمار
ابقي حمار
سيبك انت من الخضار و الخيار و الحمار
عايز اتجوز حلال دة ولا حرام ؟؟؟
عايز اشتغل اوعي تقولي انا كدة طماع
عايز لو ابني عيي اعالجه احسن علاج
لا عندك حق انا كدة سقت فيها و بحلم بالخيال
عايز اكلم السنترال
اقله حولني علي اكبر راس
بس مافيش رصيد
بس مافيش نصيب

*********

عايز اكلم حبيبي
و اقله فينك يا نصيبي
طبطب عليا كمان و كمان
مش عيب لو عايزك في حضني و ابكي علي حال الزمان
اقولك متنسنيش
متسبنيش متبعنيش
و استحمل معايا قلت رصيدي
و قديها رنات
بحبك اوي
و بموت فيكي
بس طريقي واقف بيكي
و انت مش ذنبك يا حبيبي
تستني معايا و تقف وييا
ماسك ايدي مستني نصيبي
مستني دوري لما تفتح الأشارة
عشان اطلع واجري بيكي
ناخد من حلمنا حبة
و نعوض الماضي و انا بين عينيكي
عايز اكلم حبيبي
بس مافيش رصيد
بس مافيش نصيب
********

عايز اكلم كل بلدي
عايز اكلم اهل بلدي
ليه ماعدناش فرحنين
ليه بنكره الفرحنين
ليه الحزن راكب فينا
و الضحكة دي مش لينا
عايز اكلم اهل بلدي
و اقول فين السلام
فين الأمان
ليه كل واحد طماع في جيبي
ليه كل واحد يسرق في خيري
ليه بقينا زي الوحوش
دة حرث الدنيا مش كله فلوس
فين الضحكة فين الطيبة
فين الخير فين البركة
فين الحلال و فين الحرام
ليه بقينا زي البغال
ندوس في غيرنا ندوس في دنيا
ندوس علي نفسينا
عايز اكلم اهل بلدي
بس مافيش رصيد
بس مافيش نصيب
********

عايز اكلم احلي ام
عايز اكلم احن ام
عايز اكلم امنا
عايز اكلم ام الدنيا كلها
عايز اكلمك يالي قالوا عليكي مصر
و انتي ماشية فينا عصر
خيرك كثير مليان منابع
عمر جيوب اهل المنافع
بس ليه ناسية ولادك
بس ليه ناسية شبابك
بس ليه ناسية رجالك
ليه نسيتي تجمعينا
علي حب واحد و تسيبينا
بدل ما جوانا أتشرخنا
و في حبك انتي كثير سألنا
هو حب ولا وهم
هو عشق ولا غم
شربنا نيل و لا نيلة
اكلنا أخضر ولا نجيلة
ليه في الخريطة نقطة سودة
و لا السودة دي قلوبنا و انتي رسمتي جواها خريطة
إزاي نسيبك و انتي منا
و اقفة علينا و علي قلوبنا
لو سيبناكي من يحبطنا
مين يكسر في مئدفنا
عايز اكلم يالي قالوا عليها مصر
و هي ماشية فينا عصر
بس مافيش رصيد
بس مافيش نصيب