إتصال

ألو ...
ألو ...
مين معايا ؟؟
تصدقي وحشني صوتي جدا ...
.....
مش اقصد ان صوتك هو صوتي إللي وحشني ... لأ ... انا أقصد صوتي فعلا ... وحشني ... انتي بقيتي الوحيدة إللي أقدر اكلمها بصوتي القديم ... بنبرتي الطفولية القديمة ... صوتي إللي مبقتش بقدر اطلعه او أسمعه لأي حد تاني ...
.....
صوتي إللي إتغير و مبقتش بعرف اميزه ... مبقتش بعرفه ...
.....
إنتي إزيك
الحمد لله
منكرش انك وحشتيني ... و مش مستني تقولي و انتي كمان ...
......
حتي سكوتك دة مريحني ... كفاية اني عارف انك سمعاني ... كفاية عليا اوي انك سمعاني ...
......
عارفة علي قد ما الناس قالولي ان العيب فيكي انتي ... و انك انتي إللي خنتي و سبتي و جرحتي ... و اني انا إللي كنت ملاك و مُخلص و طول الوقت واقف جمبك ...
......
و انا عارف انتي إزاي خدعتيني ... و كذبتي عليا ... و غشتيني ...
......
بس برضه عارف ان كان في عيب فيا انا ... عيب انتي نفسك رفضتي انك تقولهولي ... و اكتفيتي انك تجرحيني بطريقة معينة ... بدل طريقة تانية كانت حتبقي اقسي و اقوي ...
......
بس انا عايزك تعرفي اني عارف ... عارف انا كنت وحش في ايه ... عارف العيب فيا كان ايه ... و ان مهما الناس قالولي و حاولوا يقفوا جمبي و يساندوني ... انا و انتي بس إللي عارفين العيب إللي كان فيا كان ايه ...
.....
للاسف انا مش بعفيكي من اخطائك و ذنبك و جرحك ... بس في نفس الوقت بعترف انا كمان بذنبي ... و بعيوبي ... بعترف بنفسي ... و بعتذر ... انك اتحملتي في يوم مشقة انك تكوني حبيبتي
انت عايز ايه ؟؟؟
لا متتكلميش ... و لا تحاولي تردي عليا ... لأن في سكوتك بسمع كل الردود إللي جواكي ... كل الردود إللي انا عارفها ... انتي ذلتيني ... و انا كنت استحق اني اتذل ...
انا اسفة ...
انا إللي أسف ... انا إللي اسف اني كنت انا معاكي ... يارتني كنت عرفت اكدب عليكي و امثل زي ما انتي عملتي معايا ...
.....
يارتني كنت محبتكيش زي ما انتي محبتنيش ...
.....
بس للاسف انا حبيتك ...
....
و كنت معاكي انا
....
للاسف مبقتش عارف احب حد تاني غيرك
....
و لا عارف حتي احبك انتي ...
.....
و لا عارف احب نفسي ...
ارجوك اقفل السكة
مش حقدر ... اقفلي انتي لو عايزة ...
صوت غلق السماعة
اغلق عينيه و هو يودعها دون سلام
و تحركت شفتيه وهو يحتضن السماعة بين يديه
غير مبالي انها لما تعد هناك لتسمعه

بحبك ...