أحمد سعد عندما غني

السلام عليكم

إزيكم يا بني أدمين

مش عارف حد ممكن يقرء الكلام دة ولا لأ بس ماعلينا

في الحقيقة لقيت ان احسن حاجة ابتدي بيها مدونتي الفقيرة هي اغنية جديدة من نوعها تماما اغنية كانت كفيلة بإقناعي إني لازم ادخل الفيلم لممثل مابحبوش هو احمد عز و اقتنع ان في مغني مالوش في الغناء ممكن يطلع منه حاجة عدلة و إللي هو أحمد سعد إللي أعتبر ان دي أغنيته الأولي فعلا

الفيلم هو فيلم الشبح إخراج المخرج العبقري عمرو عرفة إللي شدني من ساعة فيلم افريكانوا وهو اول افلامه الروائية الطويلة

الأغنية سألت نفسي

الأغنية كلامتها قصيرة و بسيطة جدا

**********

سألت نفسى كتير

مرستشى يوم على بر

انا اللى فيا الخير والا اللى فيا الشر؟

مليان عيوب ولا خالى من الذنوب ولا

ولا ايه ؟

************

ولا انا جوايا

ومش دارى الاتنين فى بعض

و 500 حاجة

وملهمش دعوة ببعض

******

الأغنية بصوت احمد سعد و اللحن الرائع جدا و التوزيع الممتاز يجبرني اني اهتم بالفيلم بجد و انه تجربة جديدة فعلا شئ مشابه لديجا فو او فيس اوف مش من حكاية القصة طبعا و مع أختلاف الأمكانيات بس الفيلم واضح انه مش مجرد أكشن انما في بعد أنساني و نفسي في الفيلم متعملش قبل كدة

و إللي حيسمع فيكم الأغنية حيعرف انا قصدي ايه

و سؤال جميل اوي الأغنية بتقوله

سألت نفسي كثير و مرستش يوم علي بر

((انا إللي فيا الخير ولا إللي فيا الشر ))

انا شايف السؤال جرئ ناس كثير تخاف تساله لنفسيها ... احنا اقصي حاجة ممكن نسال نفسنا فيها انا غلطان ولا لأ

لكن معظمنا مقتنع انه خير ... طاب ايه ممكن يحصلك او تعمله عشان توصل بيك الحالة انك تقول هو انا خير ولا انا شر

الأزدواجية إللي إحنا فيها

للغلط معاني كثير و تبريرات كثير

انا ممكن اشرب حشيش لكن بانجو لأ

انا ممكن امشي مع بنات بس اكثر من كدة لأ

متفهمش دة متدين ولا فاجر مؤدب ولا صايع

إزدواجية

إزدواجية ملهاش حل

عشان ماعدش في قيمة لجيلنا نتمسك بيها و نحترمها

كله مضروب في الحيطة لا عاد في إخلاص ولا أمانة و لا شرف ولا وطنية كلها معاني زائفة لأننا أتربينا علي الشهادة و الفلوس

جيل أتظلم كثير و ظالم في نفس الوقت

ولا انا جوايا ومش دارى الاتنين فى بعض و500 حاجة وملهمش دعوة ببعض

ممكن يكون فينا إللي بيعيش اكثر من حياة بأكثر من وش

يتعامل مع طبقة من المثقفين عالية جدا و بعد كدة يروح يقعد يحشش مع عربجية و يخرج مع واحد برئ جدا و مش فاهم حاجة في الحياة ....؟؟؟؟

ايه السبب ؟؟؟؟

ليه الأزدواجية دي ...؟؟؟

بندور علي ايه ؟؟؟

و 500 حاجة وملهمش دعوة ببعض