شوية شات بقا ...

انا مش انا ... انا مش عارفني ... لا دي ملامحي ولا دة ولادة ولادة ولادة و لادة امممممممممم ولادة انا
تصدقوا من ساعة ما فتحت المدونة دي عمري ما اتكلمت بصراحة عن نفسي ...

كنت دايما بداري مشاعري و احاسيسي ورا كلام الخواطر و التشبيهات و التلميحات ...

بس لو حد قري اخر خاطرة ليا هنا حتلقوني بقول :

مش لاقي الغنوة
مش لاقي الكلمة
توصفلي شعوري
تحكيلي و عودي

فراغ تاني بقيت حاسس بيه و هو فراغ من التشبيهات و الكلام المرصوص ...

عايز اتكلم بمنتهي الصراحة عني انا معملتهاش غير في سنوية المدونة لما كتبت التدوينة بتاعت شكرا و وجهت رسايل لناس اظن انهم عمرهم ما حيقروها بس اثروا في حياتي جامد جدا ...

اظن و احنا داخلين سنة جديدة محتاج اتكلم عن نفسي تاني ...

عشان انا حاسس بدخول مرحلة جديدة قصادي ...

زي ما قلت حياتي فعلا حسيت انها ابتدت في نص 2006 و عشت احلي ايام حياتي في 2007 و عشت اسوئها في 2008 بدون شك ...

2008 كانت سنة كئيبة كئيبة كئيبة حتي في رقمها و 2007 ياعني الفرح و تحقيق احلام كثير ...

2009 ايه بقا مش عارف ؟؟؟ ادينا داخلين برجلينا اليمين و لسة حنشوف ... انا ماعنديش امل في بكرة ... ولا يأس ... انا مستنيه وبس ...

مستني اي حاجة تملي الفراغ إللي بقا جوايا من اي احساس او اي شعور ... اي حاجة تفرح ... او اي حاجة تزعل ... ايوة انا بطلت ازعل ... بطلت احزن علي اي حاجة و حاسس ان دي كارثة ... حاسس اني مت ... لدرجة اني ساعات بحاول اضرب علي جرح قلبي إللي دويته يمكن ازعل اي حاجة... افتكر او احس اني بني ادم تاني ... مافيش

لدرجة اني قلت لنفسي شوية شات بقا ...

ارجع لاول حاجة عملتها في حياتي علي النت ...

ادخل الرومات بتاعت الشات إللي مدخلتهاش من خمس سنين

اعيش شوية تفاهة زي الناس إللي هناك دول يمكن حالي يتغير و افرح شوية او انسي

دخلت و كانت تجربة غير لذيذة اطلاقا

الشباب تايهين بجد

عقلهم رايح في ستين داهية

الله يكون في عونهم و عونا

بس المهم اني برضه ماخرجتش من الحالة إللي انا فيها دي ياعني ساعة ماحبيت ابقا تافه شوية

معرفتش ):

اخدت قرار قاسي اوي علي نفسي عشان الجرح إللي اتجرحته ... خلاني مزعلش علي اي حاجة بعد كده و اكتشفت بعدين ان دي مصيبة ...

انا مش قادر احزن ... الحزن طلع مطلوب و شعور لازم نحس بيه كل فترة و انا فقدته ... و إزاي تحس بالفرح لو مجربتش الحزن ...

سنتين و مدونتي هي بيتي اكثر مكان برتاح فيه ... بيسحبني جواه من العالم كله إللي حواليا و بعيش جواها ... هي دي اوضتي ... هو دة عالمي ..

اليوم إللي حطيت فيه اول اغنية علي المدونة _ اغنية ريم البنا (المغني)_ كان يوم عيد ...

حسيت اني حطيت اخر حاجة من اساسيات بيتي ... اغنية بتطلع من قلبي قبل ماتطلع من المغني نفسه ...

و لسة حاطط ثاني اغنية من اسبوع تقريبا ...

اغنية لو كنت غالي ... عايدة الايوبي ...

بقيت ادخل المدونة مخصوص عشان اسمعها و بس ...

(( و الدنيا حلاوتها

كلمة حلوة تطمني ))

اهو دة إللي بيتقال و انا بكتب الكلمتين دول ....

من المفارقات ان 2007 كتبت فيه 34 تدوينة

و 2008 برضه 34 تدوينة

من غير ما اقصد و الله بس مفارقة لذيذة

ياتري حيحصل كدة مع 2009 ماظنش ... اظن ان 2009 حعمل فيها رقم قياسي جديد ( وش فرحان بسنانه )

نفسي في اي حاجة

مبقاش نفسي في حاجة معينة

اي حاجة

اي حاجة تحرك الخمول إللي جوايا

عايز افرح ...

او احزن

عايز احس ان بقا في حاجة غالية عليا

بس طبعا كله إلا المدونة مش عايز احزن للدرجة دي

ههههههههههه

يلا ...

اسيبكوا مع عايدة الايوبي علي اساس ياعني ان في حد استحمل وقري الك إللي فوق ده كله ( وش واحد بيتحسر علي حاله )

يلا الاقصد ...

العوافي ...