حدوتة أنسانية ... حدوتة مصرية

تعال يا بيتي احكيلك حدوتة قلتها لناس قبلك كثير ...
الحدوتة دي يا بيتي بتحكي عن انسان ...
شخص ...
كان حلم حياته يكون قاضي و رتب حياته انه يكون قاضي ...
درس و نجح قابل ناس عاش مع ناس فارق ناس ..
وهو ماشي في سكته فعلا خلاص حيبقي قاضي ...
و الناس إللي جمبه بتهتف في سر كلامها انت قاضي ...
عاش ونام وحلم و صحي انه قاضي ...
فجأة قال الحاكم علي امر الناس ...
إللي ميهزوش و لا يصحيه حاكم مستبد ... الواد دة مش حيبقي قاضي ...
كسروله حلمه و داسوله علي وردته
و اصحابوا وقفوا جمبه يبكوا ...
و يودعوه ..!!!!
جاله راجل طيب كبير ..
قاله ابوك سابلك الورث دة
بص للورث شاف ابوه الحداد ... بيديله عدته و بيقوله انت مصيرك حداد... الحاكم علي امر الناس وقف و قال دي رغبة ربي ... متبقاش انت اظلم منه و ترفض امر ربك... هزه الكلام اخد العدة و راح الحارة ... شاف الورشة لأول مرة في حياته ... دخل و غير هدومه و نام
بيبكي و يلملم ريش جنحاته إللي راحت
صبح عليه الصبح فتح الورشة و بدأ الشغل ... قابل زبون في التاني عرف جاره و إللي جمب جاره ... عمل لنفسه منهم عيلة و عزوة ... ينسوه ايامه و يحرقوله ذكرياته
فجأة البيت اتهد
بقي حبة رمل
و ورشته تحتيه راحت
و كأنها حصي في قلب الرمل
و الهم رجع زي زمان
و الجرح بقا جرحين
لقي إللي حواليه مودعهوش ..مسكوه و شالوه ..هتفوا باسمه بقلوبهم و شالوا البيت عملوه ولا القصر ... و تحتيها ورشته .. و كأن حتي لو حارتهم اتبني فيها قصر برضه الحداد حيبقي جزء منه
وهو يا بيتي بقا فرحان و قال الحمد لله اني مبقتش قاضي
فهمت يا بيتي الحدوتة ...
الحدوتة مش حلوة
و مش منتوتة ...