يمكن الغيبة بتاعتي طالت شوية بسبب ظروف كثير عندي بحاول انظمها و ارتبها لكن في جميع الأحوال راجع راجع هو انا ليا حد غيركوا ...
و كنوع من المناوشة هاجر بشقاوتها المعتادة حاولت تستفزني بتاج عشان ارجع للظهور مرة اخري و طبعا مفيش غير اني اقبل الدعوة و نشوف التاج إللي هاجر زعبل بعتتهولي ...
و علي راي المثل لو كان من نصيبك حجر اوعي تحدفه ع الناس ... اشربه ...
اسمك ؟
يوسف محي الدين
سنك ؟
21
اسم مدونتك ؟
شارع الزهور ... احم اوراق الخريف ...
مجال دراستك ؟
هندسة رقابة جودة
هل فكرت في اغلاق مدونتك ؟؟ والسبب ؟؟
انا كان ليا مدونة تانية اسمها قول يا اسمر اللون دي قفلتها بس هي رقم اثنين بعد اوراق الخريف انما اوراق الخريف يستحيل ابدا اقفلها ممكن اغيب عنها كثير بس برجعلها تاني ... المدونة التانية قفلتها لأنها كانت شخصية جدا و مع ذلك كان التعليقات فيها غير مريحة اطلاقا و الباب إللي يجيلك منه الريح متلحسوش كله ...
ايه رد فعلك لو حد قل أدبه عليك في المدونه ؟
مممم التجاهل ... انا بحب ان حد يخالفني الراي و نتناقش مع بعض بس يكون نقاش مش جدال لكن لما الموضوع حيوصل لقلة ادب فافضل رد علي السفيه ...... اجتنابه ...
أسوأ مدونه دخلتها ؟؟
كثيييييير جدا لدرجة اني بقيت مش بفتكر
هايحصل ايه لأيميلك بعد ما تموت ؟؟
حيصدي !!!!
اديت الباسوورد لحد قبل كده ؟؟
اها !!!
السفر بالنسبه لك ؟؟
كل حاجة ... السفر بالنسبالي كل حاجة ... بيغسل الروح زي الصلاة و بيريح البال و بيرفع المعنويات و بيضيف كثييييييير اوي للأنسان انا بعشق السفر و التنقل خصوصا اني انسان ملول جدا ...
المود بتاعك ايه ؟؟؟
ملول جدا ...
بتعمل ايه في وقت فراغك ؟؟؟
معظم الوقت بفكر و اكلم نفسي و لما اتعب بقرا ادخل علي النت العب شوية
الأكلات المفضله ؟؟
مممممم مش عارف دة يشمل الفواكه كمان و لا لأ بس انا بعشق الرمان جدا و الفراولة و نفسي الدنيا كلها تتحول لرمان و فراولة افضل اكل فيهم ( وش واحد مفجوع ) و بحب اكل اي حاجة بس يكون في حد بحبه بياكل معايا
الصفات اللي أخدتها عن والدك ؟؟
الطيبة ... المرح ...
الصفات اللي أخدتها من والدتك ؟؟
التفكير كثير و حساب الأمور من كل الجوانب قبل اتخاذ اي قرار
أكتر 6 حاجات بتحبهم ؟؟
اخويا الصغير محمود
اسكندرية في الشتاء
اللحظة الحلوة
السينما
الأطفال عموما
المدونة
اكثر 6 حاجات بتكرههم ؟؟
الكذب
الخيانة
الظلم
الغش
الندالة
مصطفي كامل ( المغني )
شخصيتك نوعها ايه ؟؟
طفل كبير .. اوي ... زيادة عن اللزوم
لماذا دخلت عالم التدوين من الأساس ؟؟
نوع من التعبير عن الرأي بصراحة و دون قيود خارجية مكان تعرف تتكلم فيه براحتك
احلي جمله قيلت في وصف مدونتك ؟؟
لما حد بيقولي انا حسيت بالخاطرة دي بعيدا عن المقالات
أهمية التعليقات بالنسبه لك ؟؟
احيانا مش برد عليها و دة ميعكسش انا بهتم بيها قد ايه و بأراء الناس في الحاجة إللي انا كاتبها بدل ما احس اني كتبت كلام في الهواء و محدش قراه و إلا كنت كتبتها في المدونة التانية
أحلي بوست كتبته مع ذكر السبب ؟؟
مممممممممم إجابة سهلة جدا ... البوست بتاع عيد ميلاد مدونتي الثاني خلاني الم كل التدوينات إللي كتبتها علي مدار سنتين ... بعديها علي طول البوست بتاع عيد ميلادي بقا ...
أفضل مدونه قرأتها ؟؟
كثير جدا و ضايفهم علي الجمب اتفضل روح زورهم ...
أهمية الأنترنت بالنسبه لك ؟؟
إذا كنت مش قادر تطير و تلمس السماء او تاخد غطس في قلب اعماق البحر ... النت حيعوضك عن كل دة و يخليك تطير لحتت كثير و انت قاعد مكانك
اهداء التاج ...
مها غربة وطن
حلم لسة مستسلمش
احمودي شنطة و كاب
حروووووووف
هناك 3 تعليقات:
يانهار ابييييييييييييض
الواد رجع سليم
هههههههههههههه
حمدالله ع السلامة
واعم يوسف متقولش مصطفى كامل قول حالة الاسفاف والابتذال اللى سايدة بين الناس دللوقتى وفيه كتيييييييييييييير غير مصطفى كامل
المهم حمدالله ع السلامة والتاج هرد عليه فى اقرب فرصة
سلااااااااااام
يا صلاة النبي يعني انت ترجع بتاج وتهدولي كماااااااان
بجد فرحت لما لقيت اسمي يابلدياتي
التاج في الحفظ والصون ولو قدمت كنت حليتة علي طول وعدددددددددددد ححلة بمناسبة عيد ميلاد المدونةةة خلاص قرب اوي ايتها خدمة اجابتك حلوةةة فينك مش بتيجي لية دة انا سيباللك الشاي ع باب المدونة
متغبش كتير يابلدياتي
مانا لازم اخليك تيجي تاني :)
بس لو غبت تاني بقي هلبسك تاج تاني والمره الجايه هيكون من تأليفي كمان .. انا بحذرك اهو :)))))))
اجاباتك عجباني اوي ..
وخصوصا الحاجات اللي بتحبها وبتكرهها ..:)
وكمان السفر بالنسبه لك ايه ..
اه
كنت هتخليني انسي
انا سايبه كيس كبير فيه فراوله ورمان علي باب المدونه :))))))))
إرسال تعليق