إحنا جيلنا يا يونس زي ورق الخريف ...عارف ايه هو ورق الخريف ؟؟؟ هو ورق الشجر إللي بيذبل من البرد و المطر و التراب ...ويقع من علي الشجرة وحيد ميت ... مكسور و مع اي لمسة الكسر بيحوله لتراب ...تراب بيرميه الريح لكل مكان

الجمعة، 21 أغسطس 2009

رمضان ...


مهما قالوا ... مهما وصفوا ... مهما احتفلت و انت صغير و فرحت بالجو إللي بيبقا حواليك المميز ... اول سنة بجد بقا ... ترفع ايدك لربنا ... و تصلي و تدعي لأول مرة من قلبك بجد و انت فاهم و حاسس و محتاج ... و تلاقي ان الدعوة في رمضان مختلفة ... السجدة في رمضان مختلفة ... رب رمضان هو رب كل الشهور ... لكن رمضان بيضيف كثير لروحك ... سر إلاهي ... ماحدش يعرفه غير إللي جربه من الأسرار إللي ربنا منحها لعباده بس ... فاكرين اول رمضان مر عليكوا بجد ... انا فاكر ... و فاكر اثر و فرق معايا إزاي ... كنت صغير و جسمي كله و كياني اترج ... و قلت ياااااااه بقا هو دة رمضان ... و مكدبتش خبر ... و بقيت بستني رمضان من السنة للسنة ... مكدبش عليكوا ... اخر 3 سنين ماكنتش زي السنين إللي فاتوا ... ماكنش رمضان إللي بستناه و بغسل روحي فيه و اطلع منه انسان جديد و شايل منه كثير يفضل معايا طول السنة ... بسبب ظروف و مشاكل كثير ... معظمها نفسية ... بس السنة دي سنة غير ... انا حاسس بدة ... حاسس ان رمضان السنة دي جاي زي زمان ... لما كان بالي مش مشغول بحاجات كثير ... و نفسيتي هادية و مطيعة ... و مكنش في براكين و زلازيل جوايا ممكن تهز اي جبل ... انا السنة دي مستقر ... و بإذن الله ... رمضان السنة دي راجع تاني زي زمان ... حاسس ان رمضان دة ... حيبقا رمضان غير ... اهلا رمضان ... كل سنة و انتوا كلكوا طيبين ...

الصورة المرفقة من تصميمي

الاثنين، 17 أغسطس 2009

كارت داونلود بـ10


من سنتين ... حذرونا من تحديد النت ... و ان النت حيتحدد علي الشعب المصري و طلبوا مننا اننا نودع برامج التحميل التورنت و الدونكي و الأريس و الأوربت و ...و ...و ... إلخ ..

طبعا الناس قامت ... و مقعدتش و صوتنا و لطمنا و مسكنا التراب نرميه علي رؤوسنا من هول المصيبة ... لنفاجأ بالحكومة المصرية بتقول ...

ضحكنا عليكوا ... مش حنحدد النت ...

تنفسنا الصعداء ... و قلنا الحمد لله .... اه الحكومة كان هزارها تقيل بس برضه الحمد لله ... و عرفنا كلنا قيمة النت و الداونلود في حياتنا و عشنا في غيبوية لمدة سنتين و متعرفش مين مسئول صحي من النوم تاني و قال ...

فاضل ايه للشعب المصري تاني نغم عليه بيه ... حاسس ان الناس لسة مبسوطة ... في حاجة مهونة عليهم عيشتهم ... ايييييييييييييه ؟؟؟؟

اصل مش معقول ... شعوب الدنيا كلها بتطق و بتنفجر و الشعب المصري دة صبور و مهاود ... انا عايز اعرف بقا امتي حيقوم فينا ...

تناهى إلي سمعه ان البوم عمرو دياب الجديد اتعمله داونلود بارقام خرافية ... و ان في ناس شافت السيزون الخامس من مسلسل لوست إللي متعرضش السيزون الرابع بتاعه لحد دلوقتي علي اي فضائية مفتوحة ... و ان في شباب بيدرس دلوقتي من علي النت و بينزلوا كورسات و بقم متعلمين حاجات مش بتدرس في مصر اساسا و لا حتى في الجمعيات الخيرية ...

قال بس ... هو دة ... انا حقرفهم في دي ...

اساسا هو مسئول يمتاز بالترخيم علي الشعب المصري ... اكاد اجزم انه نفس المسئول إللي اخترعلنا الجينهات الفضة ... اه اصل ملهاش سبب تاني غير انهم بيرخموا علي الشعب المصري ... الناهردا حنزل جنيهات فضة ... ليه يا اخوننا ... كدة رخامة ... و النهاردة حنحدد النت .... ليه يا سيدي ... مزاج إللي جايبني ... انا موجود عشان ارخم عليكوا ...

و الله خايف يصحي من النوم برضه في يوم من الأيام ... و تطلب معاه رخامة ... يقفل كل القهاوي إللي فيها دورة مياه... عشان الشاب من دول يمشي في الشارع محصور و مش عارف يتصرف فين ... و اهو يبقوا يدخلوا المراحيض العمومية إللي بربع جنيه ... و رخامه ... حخليها بريال ... و نحسسهم اننا بناخد منهم 5 قروش سفلقة ... و لو مزنوق اوي مش حخليه يدخل إلا لما ياخد الباقي بتاعه الخمس قروش ... بس ليه الخسارة ؟؟؟ رخامة برخامة ... نخليها 45 قرش .... عشان احنا نكسب ...

ايه تاني ممكن نرخم بيه علي الشعب المصري ؟؟؟؟ جنيهات فضة ... تحديد نت ... نقفل قهاوي ... ناهيك بقا عن العيش و السجاير و البنزين و المواصلات و المرور و المرتبات و التعليم و العشوائيات و الأمن و الماية و التليفونات .... فاضل ايييييييييييييييه ؟؟؟؟

ايه مصبر الشعب تاني علينا ؟؟؟؟

المخدرات يا ريس ... الغوا المخدرات ... لااااااااااااااااااااااااااااااااااااااااااااااا ارحمونا بقا ....

طب فاضل ايه تاني .... الشعب مستحمل لييييييييه ؟؟؟؟

و الله ممكن يعملوها مسابقة ... يلغوا مثلا الرصيف ... دة إن ماكنش فعلا اتلغي ... مممممممممم حنخلي حفلات السينما الصبح بس ... في مواعيد الشغل ... عشان إللي عايز يتفسح لازم ياخد اجازة و يخسر من مرتبه و اجازاته ...

طب نعكس بقا ... و الشعب هو إللي يقول ليييييييييييييه ؟؟؟؟

و دة يقودنا لثقافة الناحو ... ايوة ... ثقافة الناحو ...

انا كنت شغال في سنترال بتعامل مع مختلف طبقات الشعب المصري ... يحبوا يسألوك في إللي يستحيل يفهموه .... في الشبكات و التليفونات و الخطوط ... بيسألك عن المعلومة إللي يستحيل يفهمها ... و لما تحاول تفهمه ... يجادلك ... فكان الحل دايما للرد علي اي سؤال غريب لمنع حرق الدم ... هو ليه كذا بايظ ؟؟؟ .... الرد .... عشان الناحو منحمل ... يا مستنحمل ... و ريني التليفون كدة ... لا هو منحمل ...
طبعا هو ميفهمش حاجة .... فيقتنع ... و يهز راسه ... و يمشي ...

هو دة مبدأ الحكومة برضه ... الناحو منحمل يا مستنحمل ...

منعوا السينما بليل لحفظ الأخلاق العامة ... حطوا جنيهات فضة منعا لنقل الأمراض ... منعوا القهاوي إللي فيها دورة ماية حفاظا علي الصحة العامة ... و حددوا النت عشان الأستهلاك الرشيد ...
و احنا منفهمش اي حاجة ... و نمشي نقول ايوة صح هو منحمل مش مستنحمل .... حسبي الله و نعم الوكيل ....

ايه الأستهلاك الرشيد دة ؟؟؟؟ دة قريب هارون الرشيد يعني ؟؟؟؟
عايز افهم ....
طب انا ليا 25 جيجا في الشهر ...
معني كدة اني مش حعلم اخويا الصغير ياعني ايه داونلود .... بالعكس ... انا حخبي عليه ... و مش حسمحله انه يعرف المصطلح ده ... ياعني اعلم اخويا الصغير ياعني ايه داونلود و يخلصلي الـ25 جيجا بقا ان شاء الله و هو بينزلي لعب و اغاني ... و بيجرب حظه ... لا ياعم ... انا حطلعه جاهل احسن .... و طظ كبيرة في الجيل القادم عنه ما اتعلم نت ولا داونلود ... انا مال اهلي انا خليني في الـ25 جيجا بتوعي اكرملي .... و عيالي كمان مش حعلمهم النت و الداونلود ... حوديهم الكتاب ... زرع , حصد , خلع .... اوفر و اكرم ... احنا مالناش نفس نطلع برة عن كده ابدا ...

طبعا كل دة حيتحل لو استغلوا الفرصة و عملوا كروت داونلود زي كروت الشحت .... و لما تعوز تعمل داونلود لأي حاجة تنزل عند البقال تجيب من عنده كارت دوانلود بـ 10 ...